“Будні і святы вытворчай брыгады калгаса “Першае мая” Мядзведзіцкай сярэдняй школы Ляхавіцкага раёна”
У канцы пядзідзятых гадоў мінулага стагоддзя ў сельскіх школах ствараліся вучнёўскія вытворчыя брыгады. Школы бралі ў калгасе зямлю і сіламі вучняў яе апрацоўвалі, а на выручаныя грошы набывалі неабходныя для школы рэчы. Вытворчая вучнёўская брыгада Мядзведзіцкай школы налічвала 16 звенняў. Самым мнагалікім было звяно па вырошчванні кукурузы, дзе звеннявымі былі Лёня Коршун і Валодзя Машэй. Атрымаўшы перамогу ў раённых спаборніцтвах, яны былі ўдастоены прадстаўляць раён на Усесаюзнай сельскагаспадарчай выставе звеннявых. 31 гектар зямлі быў засеяны кукурузай, вучні не проста вырошчвалі яе, але і праводзілі розныя селекцыйныя доследы, якія дапамагалі павысіць ураджайнасць. І як вынік атэстат І ступені на ВНД у Маскве, які мы перадалі ў Баранавіцкі краязнаўчы музей.
Пасля заняткаў вучні спяшаліся не дадому, а ў поле. За рулём трактара “Беларус” сядзеў Аляксандар Юруць, а машынай ЗІС – 150 віртуозна кіраваў Антон Ходар. Неабходна было вясной пасадзіць бульбу, буракі, летам зрабіць дзве праполкі, восенню сабраць ураджай, звесці на прысядзібны школьны ўчастак, а лішкі аддаць калгасу. Займаліся нарыхтоўкай сена, касілі, сушылі, звозілі ў гумно. Школьнікі апрацоўвалі сто гектараў зямлі.
Яніна Пляшэвіч накіроўвалася да сваёй вадаплаўнай птушкі, хоць клопатаў па дамашняй гаспадарцы ў дзяўчыны было многа. Дома чакалі два нямыя малодшыя брацікі. Тры гады ляжала ў пасцелі маці, бацька памёр.
Дзяўчына ўсё паспявала, была выдатніцай у школе, яе партрэт упрыгожваў куток працоўнай славы. Пасля заканчэння школы стала настаўніцай.
Была пры школе і вытворчая майстэрня з будаўнічай брыгадай. У 1959 годзе сіламі вучняў і бацькоў з дапамогай калгаснікаў была пабудавана першая ў раёне спартыўная зала.
Умелі тагачасныя піянеры і камсамольцы не толькі працаваць, але і адпачываць. Ладзілі спаборніцтвы, спрабавалі сябе ў мастацкай самадзейнасці, рыхтавалі канцэрты для бацькоў. Летам адпраўляліся на маляўнічы бараг Шчары ў палатачны лагер.
Усім працэсам кіраваў старшыня вытворчай брыгады Вася Кузняцоў, а падтрымліваў і натхняў на працу дырэктар школы Дзегялевіч Іван Піліпавіч.
Па матэрыялах газеты “Савецкі патрыёт” . Нататка “Брыгада юных “ № 59-65, 1959 г.
Дырэктар Мядзведзіцкай школы
Атэстат першай ступені з ВДНГ
На ўборцы сена
На ўборцы бульбы
Пабудова першай спартыўнай залы ў Ляхавіцкім раёне
Спартыўная зала
Кіраўніцтва раёна высока ацаніла працу дырэктара
Інфармацыйная гадзіна з вучнямі 6 класаў
Перадача экспанатаў навуковаму супрацоўніку Баранавіцкага краязнаўчага музея
Аўтары: Бойка Андрэй, Кабяк Арцём, Юрлевіч Сяргей